البولتيك بالمغرب سقراط يخرج عن صمته ويقول : اه تراجعت .. و هاعلاش غادي نصوت

التغيير مايمكنش يجي عبر المقاطعة والتنحي عن ممارسة الحقوق المدنية للفرد ، هاد الحقوق لي ناضلوا عليها أغلب البشر فمختلف البلدان وفالعالم المتحضر خصوصا عبر قرون باش يكتاسبوها ، ومنها الحق فالتصويت لي ماتوا الناس على ودو فالمظاهرات والإحتجاجات فماريكان وفبريطانيا وغي تالهنا وهنا ، والحمد الله حنا وصلنا فابور بلا تاشي مجهود مفروض من الفوق من أجل مشاركة الشعب فصنع القرار ، لذا فمن واجباتنا كمواطنين اتجاه أنفسنا واتجاه هاد البلاد هي أننا ننخارطوا فالفعل السياسي عبر التصويت والمحاسبة والتظاهر وكل الطرق المتاحة لي تخلينا نعيشوا كمواطنين أحرار فبلاد الرجال الأحرار.

الى أنا ونتا ونتي ولاخر ولخرى قرروا أنهم مايمارسوش حقهم فالتصويت كرفض منهم لمهزلة لإنتخابات فالمغرب، فراه كاين لي غادي يصوت وكاين لي غادي يقرر مصير هاد البلاد والناس لي غادي يقودوها للخمس سنوات الماضية وحسب التجارب السابقة مكنظنش أنه عندو الأهلية الكاملة باش يختار الرجل المناسب أو الحزب المناسب ، راه العدمية ديالنا وهاد الحياد والسلبية وكثرة التشكي هي لي خلات هاد البلاد هاكة ، اييه الفساد طالق عروقوا فالدولة ولكن بالإرادة الصلبة والقوية والمتجدرة يمكن نحاربوه ، باش نضمنوا مكان أفضل لولادنا ماشي لينا ، وباش نحاربوا هادشي أو نحاولوا الإصلاح ديالو ، فراه خاص ننخارطوا كلنا فمسلسل الإصلاح الديمقراطي ،منخليوش غي الملك بوحدو لي باغي يصلح وحنا كالسين كننتاقدوا وفاقدين الأمل .

طبعا غادي نصوت وغادي ننخرط فحزب سياسي وهذا واجب على كل الشباب المغربي أنهم ينخارطوا فالعمل السياسي الى كانت بصح عندهم نية للإصلاح ورغبة باش تزيد بلادنا القدام ( فين الله وعلم )، حيث لا اصلاح إلا من الداخل ، إييه مايمكن تدير والو من برا ، خاصك تحشيه معاهم عاد يمكنليك تغير أو تصلح ، لذا فالواجب علينا كمواطنين صالحين شرفاء دافعي الضرائب ، هو أننا نخرجوا من هاد الحالة ديال السلبية والتبخيسية ، ونقولوا للمسؤولين بلي راه حنا كاينين وعارفين آ شطاري ومن اليوم ماغاديش نبقاو ساكتين .

غادي نصوت باش باش على الأقل نحاول نحد من وصول مفسد للسلطة ، والى مصدقاتش هاد المرة تصدق المرة لخرى ، غادي نصوت باش ملي نحاسب ونهدر والى خرجت للشارع تضاهرت يكون عندي حق ، لأنني ختاريت وتخدلت ، ماشي غي حيث مكاين مايدار قلت أرى نخرج ( بحال لي وقع فعشرين فبراير ) ، غادي نصوت باش نخفف الحمل على الملك بأنني نختار ناس أكفاء لي غادي يعاونوه فتطبيق الرؤى المولوية ديالو وسياساته لهاد البلاد ، غادي نصوت باش نغير وباش مانتشمتش هاعلاش غادي نصوت .

محمد سقراط كود